对文物遗产保护的慨叹
人民书画网
2016-02-24 09:38:51
阅读：次
核心提示：
最近，“广州文化蓝皮书”透露，西关大屋鼎盛时期有八百几间，但由于大肆拆建破坏，而家剩番一百几间，有保留价值嘅就只有10间左右，真系相当可惜。
不过，要保护好西关大屋呢种文物，又谈何容易?回想几年前，我哋屋企喺西关都有一间屋，虽然唔似有钱人咁大，但都有两层半高，喺新中国成立前买落嘅，坐北向南，都几试正嘎。
呢间大屋嘅消逝，其实好有时代性。就讲陈设，以前中堂本来挂有祖先朝服照，系成间屋嘅“气场”所在，但遇到家家户户“破四旧”，因为惧怕受到冲击，一个月黑风高嘅夜晚就无奈烧咗。
后尾，全国经济困难，阿婆养住7个仔女唔容易，只好变卖部分古董家私，件件都系酸枝，换着今日就值钱咯。
屋内仲有一扇雕花隔墙，印象中刻住“喜鹊登梅”，古色古香，但因为无钱维修而被虫蛀。有一次，屋企要“抖”家私，剩余少许“苹果绿漆”，就将隔扇油咗一层，虽然唔三唔四，但总好过蛀空倒塌。
改革开放后，大家有钱了，想维修呢间饱经风霜、摇摇欲坠嘅祖屋，但系就发现样样材料都冇了。瓦背冇人造，地砖唔再生产，大梁用嘅木材亦难再得，最后只好拆除重建。
回想起来，一间普通大屋，要保护起来都尚且咁唔容易，又何况广州众多文物建筑呢?
